കസ്റ്റമര്‍ സര്‍‌വീസ്

മറ്റ് ആണ്‍കുട്ടികളെ പോലെ ആജുവും ഒരു വാഹനപ്രിയനാണ്.ചെറുപ്പം മുതലേ അകലെ കാണുന്ന കാറിന്റെ ബ്രാന്റും മോഡലും പറയാലാണ് യാത്ര ചെയ്യുമ്പോള്‍ അവന്റെ വിനോദം.
പഠിച്ച് ജോലിക്ക് പോകുന്നത് തന്നെ ഇഷ്ട വാഹനമായ ഹമ്മര്‍ വാങ്ങാനാണെന്നാണ് അവന്റെ ഭാഷ്യം.ബൈക്ക് റേസിങ്ങ് ഗയിമിലായാലും ടിവിയില്‍ കാണാനും താല്പര്യം.

അനിയത്തിയുടെ കല്യാണത്തിരക്കിനിടെ ഇവന്‍ ദേഷ്യം പിടിച്ച് എന്റെയടുത്ത് വന്ന് പറഞ്ഞു,ഇവിടുത്തെ കടക്കാര്‍ക്കൊന്നും ഒരു മാനേഴ്സുമില്ല എന്ന്.

സംഭവം ഇതാണ്: ഹാളിന്റെ അതേ ബില്‍ഡിങ്ങില്‍ തന്നെയുള്ള കടയില്‍ വില്‍ക്കാന്‍ വെച്ചിരിക്കുന്ന ഹെല്‍മെറ്റുകള്‍ കാണാന്‍ കയറിയതായിരുന്നു അവന്‍.ദുബായില്‍ ഏത് പെട്ടിക്കടയിലും കയറി നമുക്ക് ഇഷ്ടമുള്ളതെടുത്ത് നോക്കാം ,ടെസ്റ്റ് ചെയ്യാം എന്നിട്ട് ഇഷ്ടപ്പെട്ടതുമായി കൗണ്ടറില്‍ ചെന്ന് പൈസ കൊടുക്കുന്ന പരിചയം വെച്ച് ഒരു ഹെല്‍മെറ്റെടുത്ത് ഗ്ലാസ് ഡോറില്‍ ഭം‌ഗി നോക്കുന്നതിനിടെ കടക്കാരന്‍ വന്ന് ഹെല്‍മറ്റ് പിടിച്ച് വാങ്ങി ഇവന്റെ ചെവിക്ക് പിടിച്ചതാണ് നാട്ടിലെ മാനേഴ്സില്ലായ്മയെ പറ്റി പരാതി പറയാന്‍ കാരണം.എന്തായാലും വെറുതെയവിടെ നിന്ന് അവനും മടങ്ങിയില്ല.ഏന്തി വലിഞ്ഞായാലും അയാളുടെ ചെവിക്ക് കേറിയും ഒന്ന് പിടിച്ചിട്ടാണ് പൊന്നത്.

അവസാനം എന്‍‌റ്റെ അമ്മാവന്‍‌മാര്‍ കാര്യം അന്‍‌വേഷിക്കാന്‍ ചെന്നപ്പോഴാണ് കടക്കാര്‍ ക്ഷമാപണം നടത്താന്‍ തയ്യാറായത്.